زجلية رائعة روائع الشاعر محمد حديش/المغرب

 جَدْبًةْ الْكلامْ

~~~~~~

تْعَرَّى  بوحْ  الجًّدْبا  كْلامْ  

نَغّصْ حَرْ  ضَّغْما  تَحْيارْ

لًمْجاجْ تَنْخَضْ لاحْ السَّلْهامْ

شَرْ الوْجَهْ الْقاصَحْ دَوَّاني

لْبَسْ لَمْقَزْدَرْ زْواقْ مْعَنْتَرْ

تْنَكَّرْ لْدَمُّو ؤُباعْ الْخُّوتْ

إِمْتا تْفيقْ عْقولْ الرْڭادْ

ضَبْرَتْ الصْبَرْ مْغَرْڭا راسي

الْموسْ شَقْ عْضَمْ الصْبَرْ

ؤُحْماقْ النْهارْ بَضْلامْ زْفَرْ

تْكالْ المْقَشًّرْ بَزْلَطْ مْشَحَّرْ

شْحالْ وَصَّلْ الْخايَنْ لَلْبَرَّاني

تْسَفَّحْ المْخَبِّي ؤُبانْ الُّبانْ

دَوْخاتْ مْجاجْ هْبَلْ تَرْبَح

الوْكَرْ تَهْجَرْ ؤُطارْ المَزْيانْ

تْسَيَّفْ بْنادَمْ بَوْجَهْ رُوحاني

الْحيطْ مْتَكِّي مايَلْ مَڭْعورْ

مْضَرَّك ڭَرْڭاعْ خاوي مُخْ

تَعْمارْ  شْوارَجْ دَلْ النَّفْسْ

تَمَّا تْوَعَّتْ الخاطَرْ فْرَّادي 

الَّلهْفا جَرَّاتْ شْحيمَتْ الطْمَعْ

سِيْلاتْ رْيوڭْ ؤُدَلاَّتْ الْلسانْ

ضَبْعاتْ شَلاَّ ڭْماڭَمْ تَرْقادْ

تْحَقَّقْ تَحْماقْ إِخَلِّيوْكْ داوي

جارْ  أَرْضَكْ  تْنَكَّرْ  مَسْعورْ 

باعَكْ غْدَرْ بَحْسيفَتْ الغْيارْ

النَّاسْ بَالأَصْلْ تَعْرَفْ جْدَرْ

ؤُكُلْ دْميمْ ديبْ رَعْواني

الْكَسْدا صاطْ ريحْها مْڭَيَّلْ

شْعا القْرانَبْ طُكَكْ شانَتْ

التَّاعَسْ لْبَسْ خيشْ قَنَّبْ

تْكَلَّمْ مْرَزَّنْ رَجْعُوهْ بوهالي

حْتَّى لينْ القَهْراتْ  تَطْحَنْ

نَيْلاتْ الطْحينْ قَرْجًطْ الْهَمْ

ؤُتْكالْ حْصادْ دْميرْ الخَمَّاسْ

تَسْرَطْ ناشَفْ ؤُتَعْصَرْ حًرَّاني

الله  عْليكْ  ياديكْ  الِيَّامْ

ناسْها جْبالْ النَّخْوا وَالْجودْ

اخْبارْهُمْ تْزَمَّات رْسومْ العَزْ

غَرْسو ؤُكافْحو بَصْبَرْ رْواني

بَخْيوطْ الڭَمْرا ڭَبَّصْتْ السْقَفْ

ؤُنْقَشْتْ تاويلْ خاطَرْ  النَّفْسْ

لْبَسْتْها  رَزَّا  دْفَّاتْ  الرَّاسْ

بَلْوانْ عَشْقاتْ العْمَرْ الْفاني

وْجوهْ تَهْديهَمْ صْفا مْحًبْتَكْ

يْكَرْموكْ مْكَرْ بْعَضَّةْ الحْنَشْ

ؤالوادْ ساڭْهم بالقيلْ وَالقالْ

كُلْها كامَشْ طَموعْ القَرَّاني

لله يا المْهَبًّلْني حن كْريمْ

داوي سْخانَتْ لَبْغو ؤُبَخْ

رْفَقْ مابِيا لاتْكونْ قاصَحْ

راهْ  غرامَكْ  هَيَّجْ حالي

وْتاقْ العَطْفا طَيْرو الرِّيحْ 

ؤُتْلَفٌ  تَدْواحْ  نِيَّةْ  الْبالْ

تْهَرَّسْ كاسْ مْحَبَّةْ الدَّاتْ

مَكينْ غيرْ تَصْباغْ قَرْطاسي 

شَلاًّ هازْ الڭَلْبْ المْوعَّتْ 

شادْ حْبَلْ الْيقينْ عْوَّالْ

مَنِّي حَرْڭَتْ ليفاتْ تَزْهَرْ 

نْغيبْ سابَحْ مْسَّبحْ الْعالي

مَن  كْلامْ  لَكْلامْ  جَدْباتْ

تَسْڭاتْ رِيَّا رْواتْ شَّحْفاتْ

كْتَبْها سْواكَنْ عَشْقْ الْحَرْفْ

وْفا صادَقْ عْطِيَّتْ الْهادي

ب͠ق͠ل͠م͠ م͠ح͠م͠د͠ ح͠د͠ي͠ش͠ 

        م͠.ج͠.ح͠ 

2020\10\20